Tæknótíðindi
28. apríl 2026
Rafíþróttalið Tækniskólans er sigurvegari Framhaldsskólaleika Rafíþróttasamtaka Íslands (FRÍS) 2026.
Liðið heitir Tæknó E-sports og er skipað nemendum af tölvubraut, rafvirkjun, opinni braut, í Raftækniskólanum og múraraiðn.
Liðið keppti í þremur vinsælum leikjum: Counter-Strike 2, Rocket League og Mario Kart World.
Vigfús Karl Steinsson, þjálfari liðsins, er gríðarlega ánægður með árangurinn.
„Ég er ótrúlega stoltur af liðinu. Þau hafa öll sýnt sig og sannað sem framúrskarandi einstaklingar og ég er þakklátur fyrir tímabilið með þeim!“
Við óskum liðinu okkar innilega til hamingju með árangurinn og hvetjum öll til að fylgjast áfram með uppbyggingu rafíþrótta í Tækniskólanum.
Fimmtudaginn 5. maí 2026 kl.17:00
Fundurinn verður haldinn í hátíðarsal Tækniskólans við Háteigsveg fimmtudaginn 7. maí 2026 kl.17:00
Dagskrá
Skýrsla stjórnar
Umræður um starf foreldrafélagsins
Kosning í foreldraráð
Í tengslum við aðalfundinn viljum við sérstaklega hvetja foreldra og forsjáraðila nemenda Tækniskólans til að bjóða sig fram í foreldraráð skólans.
Félagar í foreldraráði eru foreldrar og forsjáraðilar nemenda við Tækniskólann og eiga allir forsjáraðilar rétt á aðild.
Tilgangur foreldraráðs er að stuðla að auknum gæðum skólans og bæta skilyrði og aðstæður nemenda til náms og þroska.
Helstu áherslur foreldraráðs eru meðal annars að:
- Stuðla að aukinni þekkingu foreldra/forsjáraðila á réttindum og skyldum sínum og barna þeirra.
- Auka sýnileika og hlutverk foreldra/forsjáraðila sem stuðningsaðila í skólastarfinu.
- Vera samráðs- og samstarfsvettvangur foreldra/forsjáraðila.
- Treysta samstarf foreldra/forsjáraðila, starfsfólks skólans og Nemendasambands Tækniskólans (NST).
- Hvetja foreldra/forsjáraðila til að styðja við nám og velferð barna sinna.
- Vera bakhjarl skólans og standa vörð um réttindi nemenda til menntunar og farsæls þroska.
Við vonumst til að sjá sem flest á fundinum og hvetjum þau sem eru áhugasöm til að taka þátt í þessu mikilvæga og gefandi starfi með okkur.
Fyrir nánari upplýsingar eða ef áhugi er fyrir þátttöku í foreldraráði er velkomið að hafa samband við Láru Debarunu Árnadóttur, félagslífsfulltrúa.
Miðvikudaginn 18. febrúar fór fram skólafundur í Tækniskólanum. Samkvæmt lögum um framhaldsskóla skal halda skólafund a.m.k. einu sinni á skólaári en skólafundir eru mikilvægur lýðræðislegur vettvangur fyrir nemendur skólans til að koma sínum málefnum á framfæri.
Fjórar spurningar sem mótaðar voru með fulltrúum í Skólaráði voru lagðar fram á fundinum:
Hvernig getur skólinn undirbúið nemendur betur fyrir lífið eftir framhaldsskóla?
Hvernig getur skólinn komið betur til móts við þarfir hvers og eins nemanda?
Hvað er hægt að gera til þess að nemendum líði betur í skólanum?
Ef þið mættuð skipuleggja félagslífið í Tækniskólanum, hvað mynduð þið setja á dagskrá?
Á fundinum komu fram skýrar áherslur nemenda um umbætur á skólastarfi. Nemendur vilja aukinn undirbúning fyrir lífið eftir framhaldsskóla, meðal annars aukið fjármálalæsi og fræðslu um hvers kyns lífsleikni, hagnýtara og verklegra nám og sterk tengsl við atvinnulífið. Að neðan má sjá samantekt á áherslum sem fram komu á skólfundi sem voru í reynd fjölmargir fundir sem dreifðust um fjölda stofa í húsum Tækniskólans.
Einnig kom fram áhersla á einstaklingsmiðað og sveigjanlegt nám, fjölbreyttar námsleiðir og matsaðferðir, aukið aðgengi að ráðgjöf og meiri áherslu á að raddir nemenda hafi raunveruleg áhrif.
Til að bæta líðan nemenda var lögð áhersla á eflingu andlegrar heilsu, aukið öryggi og stuðning, bætt samskipti og skipulag, sem og betri aðstöðu í skólanum, svo sem loftræstingu, húsgögn og slökunarrými.
Að lokum lögðu nemendur áherslu á fjölbreytt og virkt félagslíf með auknum viðburðum, klúbbastarfi og betri nýtingu á aðstöðu skólans, þar á meðal fleiri viðburðum á skólatíma.
Við þökkum nemendum og starfsfólki kærlega fyrir þátttökuna.
