Tæknótíðindi

• 3. mars - Námsmat - Miðannarmat birtist í Innu kl. 12:00
• 4. mars - Námsmat
• 5. mars - Starfsdagur - Skóli lokaður og lokaeinkunnir áfanga á fyrri spönn birtast í Innu kl. 16:00
• 6. mars - Kennsla hefst á spönn 2
• 10. mars - Valvika hefst

Skóladagatal Tækiskólans á PDF formi er aðgengilegt hér!

Það var góð stemning á árshátíðarballi MH og Tækniskólans í Hvalasafninu í fyrradag. Ungmennin voru langflest til mikillar fyrirmyndar og skemmtu sér fallega. Það var frábært að fylgjast með slúttinu á kvöldinu þegar þau sungu lagið ,,Ég er kominn heim" undir svífandi hvölum eins og sjá má í þessu myndskeiði.

Við vekjum athygli á því að Tækni­skólinn verður lokaður miðvikudaginn 5. mars vegna starfsdags kennara.

Klúbba­kvöld Eniac eru haldin alla miðviku­daga kl. 17:00–21:00 á Háteigsvegi nema þegar það er ekki skóli.

Allir nemendur í Tækniskólanum geta stofnað klúbb og stjórn NST aðstoðar t.d. að finna aðstöðu í skólanum, fá spil og þess háttar.

Klúbbar vikunnar eru auglýstir á Discord server ENIAC. Endilega fylgist með þar!

Í valvikunni 10.–14. mars staðfesta nemendur í dagskóla umsókn sína um áframhaldandi skólavist á næstu önn.

Það er gert með því að yfirfara og staðfesta val næstu annar í Innu og greiða álögð skólagjöld. Þá þurfa þeir ekki að sækja aftur formlega um skólavist.

Nemendur geta einnig sótt um brauta­skipti í valvikunni og síðasti dagur til að óska eftir braut­ar­skiptum er í lok föstu­dagsins 14. mars.

Fimmtudaginn 6. mars fögnum við nýrri spönn með vöfflukaffi. Þá mæta stjórnendur skólans með vöfflujárn í vinnuna og baka ofan í öll sem kunna að meta góðar vöfflur.

Vöffl­urnar verða í boði í mat­salnum á Skólavörðuholti, á Háteigs­vegi og í Hafnarfirði í frímínútunum kl. 14:25.

Láttu endilega sjá þig og nældu þér í rjúkandi heita vöfflu!

Föstudaginn 21. febrúar frumsýndi leikfélagið MARS leikritið Klú sem byggði á morðgátuspilinu Clue. Leiksýningarnar gengu vonum framar, voru stórkemmtilegar og var uppselt á tvær sýningar af þremur.

Við óskum nemendum í leikfélaginu hjartanlega til hamingju með þessa glæsilegu uppsetningu. Í haust gefst svo nýtt tækifæri til þess að taka þátt í leiksýningu vetrarins 25/26.