Mars mánuður hefst með viðtalsdögum þar sem nemendur meta sjálfir námsframvindu sína, ræða um námsvitund og útskýra hvernig þeim gengur að ná markmiðum sínum. Þessi nálgun endurspeglar áherslu skólans á að efla sjálfstæði nemenda og þátttöku þeirra í eigin námi. Að viðtalsdögum loknum tekur við kærkomið vetrarfrí hjá nemendum.
Það er gaman að segja frá því að Naustaskóli hefur á undanförnum vikum vakið athygli fyrir fjölbreytt og metnaðarfullt starf. Nýlega var haldin vel heppnuð 600 Mathöll þar sem námið er samþætt við nokkrar námsgreinar og það gert bæði lifandi og skemmtileg. Teymi 4.-5. bekkjar hefur í vetur unnið með ritun sem hefur vakið verðskuldaða athygli, verkefnið er unnið eftir vel skipulögðu ársskipulagi sem leggur áherslu á fjölbreyttar aðferðir við ritun og skapandi skrif.
Sérstakt fagnaðarefni er að teymi 1. bekkjar hefur hlotið viðurkenningu frá fræðsluráði Akureyrar fyrir framúrskarandi starf sitt. Þessi viðurkenning er ekki aðeins hvatning fyrir starfsfólk skólans heldur einnig staðfesting á þeirri metnaðarfullu vinnu sem fram fer í Naustaskóla á öllum skólastigum. Síðan er mjög ánægjulegt að segja frá því að Aron Emil Kolbeins hlýtur viðurkenningu fyrir framfarir og þrautseigju.
Undirbúningur fyrir árshátíð Naustaskóla er hafinn. Hátíðin, sem fram fer 10. apríl næstkomandi, og er einn af stærstu viðburðum skólaársins en viðburðurinn er mikilvægur þáttur í fjölbreyttu skólastarfi Naustaskóla.
Með kærri kveðju
Bryndís, Helga Ósk og Þuríður
