Fréttabréf Síðuskóla

Nú eru einungis rúmar fjórar vikur þar til skólahaldi lýkur. Síðasti kennsludagur er 4. júní og skólaslit verða þann 5. júní. Nemendur í 1.-9. bekk mæta á skólaslit hér í skólanum en að vanda verða nemendur 10. bekkjar útskrifaðir í Glerárkirkju. Frekari upplýsingar um fyrirkomulag skólaslita verða sendar út þegar nær dregur.

Gönguferðin sem fella þurfti niður í haust verður farin á umhverfisdegi þann 3. júní og vonum við svo sannarlega að veðurguðirnir verði okkur hliðhollir þann dag.

Eins og jafnan í lok skólaárs verða nokkrar breytingar á starfsmannahaldi. Það lítur út fyrir að nemendafjöldi verði svipaður á næsta skólaári en nú eru 387 nemendur í skólanum. Næsta haust munu 34 nemendur hefja skólagöngu í 1. bekk. Þessa dagana stendur yfir skipulagning næsta skólaárs, við sendum ykkur nánari upplýsingar um leið og þær liggja fyrir.

Það er margt á döfinni í maí og nánari upplýsingar um það er að finna neðar í fréttabréfinu.

Margir hafa tekið hjólin sín í notkun enda hefur veðrið leikið við okkur. Við viljum því minna á lög um hjálmaskyldu barna á grunnskólaaldri.

Bestu kveðjur úr skólanum!

Ólöf, Malli og Helga

Síðuskóli tekur þátt í Fiðringi, lokahátíðin fer fram í Hofi í kvöld, miðvikudaginn 7. maí kl. 20. Atriði Síðuskóla heitir Það sem gerist í sjónum. Atriðið fjallar um þá ógn sem steðjar að sjávarlífverum vegna plastúrgangs og annarra mengandi efna sem berast í hafið. Atriðið hvetur áhorfendur til umhugsunar um mikilvægi umhverfisverndar og sjálfbærni.

Á myndinni hér fyrir neðan má sjá þátttakendur frá Síðuskóla, við óskum þeim góðs gengis í Hofi!

Við bendum áhugasömum á að miðasala fer fram á tix.is

Fimmtudaginn 15. maí verður haldið Barnaþing í Síðuskóla sem liður í Réttindaskólavinnu skólans. Þingið mun fara fram í íþróttahúsinu og verður þrískipt eftir aldursstigum þar sem nemendur fá tækifæri til að ræða málefni sem þeim eru hugleikin.

Barnaþing er mikilvægur vettvangur þar sem rödd barna og ungmenna fær að heyrast í málefnum sem snerta þeirra daglega líf og samfélagið sem þau búa í. Þetta er í anda 12. greinar Barnasáttmála Sameinuðu þjóðanna sem kveður á um rétt barna til að láta skoðanir sínar í ljós og að tekið sé réttmætt tillit til þeirra.

Niðurstöður Barnaþingsins verða teknar saman og kynntar fyrir nemendum og starfsfólki sem mun svo bregðast við helstu áherslum og erindum sem fram koma.

Barnaþing er mikilvægur liður í því að efla lýðræðisvitund nemenda og gefa þeim tækifæri til að hafa áhrif á sitt nánasta umhverfi. Með því að taka virkan þátt í Barnaþinginu læra nemendur að koma skoðunum sínum á framfæri og vinna með öðrum að sameiginlegum lausnum.

Pangea stærðfræðikeppni er fyrir alla nemendur áttundu og níundu bekkja grunnskóla landsins. Aðalmarkmið keppninnar er að vekja áhuga hjá ungu fólki á stærðfræði, hvetja þau sem halda að stærðfræði sé of erfið til dáða með því að sýna þeim að þau geti afrekað mikið ef þau reyna, og hvetja efnilegustu nemendurna til áframhaldandi afreka. Keppnin er haldin um allt land og er stigahæstu nemendum hvers skóla síðan boðið í úrslitakeppni sem haldin verður í Reykjavík. Í ár fara þeir Alex Hrafn Sólmundsson og Ýmir Helgi Teitsson, úr 8. bekk, sem fulltrúar Síðuskóla. Til hamingju strákar!

Lið Síðuskóla lenti í 3. sæti í undankeppni Skólahreysti sem fram fór í Íþróttahöllinni í kvöld. Keppnin var æsispennandi og hnífjöfn, en aðeins eitt stig skildi á milli sigurliðsins frá Lundarskóla og liðanna sem enduðu í 2. og 3. sæti.

Við erum afar stolt af frammistöðu okkar keppenda þeim Sóldísi, Kára, Höllu og Patreki ásamt varamönnunum Elíasi og Kolbrúnu Svönu sem öll stóðu sig gríðarlega vel og sýndu mikla liðsheild og keppnisanda.

• Nemandi sem kemur hjólandi í skólann gerir það á ábyrgð foreldra/forráðamanna sem meta færni barnsins og aðstæður á hjólaleiðinni. Skv. 44. grein umferðarlaga mega börn yngri en níu ára ekki hjóla á akbraut án leiðsagnar og eftirlits aðila sem hefur náð 15 ára aldri. Þar af leiðandi getur skólinn ekki mælt með að þeir nemendur komi á hjóli í skólann nema í fylgd fullorðinna.
• Samkvæmt umferðarlögum er börnum yngri en 16 ára skylt að nota reiðhjólahjálm.

Ákvörðun er foreldra og á ábyrgð þeirra.

7. maí

Fiðringur, lokakeppni í Hofi

8. maí

Sjúk ást, fræðsla í 8. bekk

Stelpur kl. 8.10 og strákar kl. 8.50

12. maí

Litla upplestrarkeppnin kl. 10

15. maí

Barnaþing, nánari upplýsingar koma frá réttindaráði

16. maí

Sultuplástur, 6. bekkur kl. 9

19. maí

Skipulagsdagur

20. maí

Frjálsíþróttamót í Boganum - 7. bekkur

Hinsegin fræðsla í 9. bekk (hópur 1)

21.-23. maí

10. bekkur í skólaferðalagi

21. maí

Frjálsíþróttamót í Boganum - 6. bekkur

22. maí

Frjálsíþróttamót í Boganum - 5. bekkur

Orri óstöðvandi - 6. bekkur kl. 12.45

Hinsegin fræðsla í 9. bekk (hópur 2)

23. maí

Frjálsíþróttamót í Boganum - 4. bekkur

Orri óstöðvandi - 5. og 6. kl. 12.45

29. maí

Uppstigningardagur - frídagur
3. júní

Umhverfisdagur

4. júní

Umhverfisdagur
5. júní

Skólaslit

6., 10. og 11. júní

Skipulagsdagar