Hvalrekinn

Við óskum ykkur og fjölskyldum ykkar gleði- og hamingjuríkra jóla.

Megi gæfa og góð heilsa umvefja ykkur um hátíðina og á nýju ári.

Með kærleikskveðju,

stjórnendur og starfsfólk Hvaleyrarskóla.

• • Jólamatur frá Matarstund verður þennan dag.
  • Við hvetjum nemendur og starfsfólk til að mæta í jólapeysunum sínum og/eða einhverju rauðu.

Nemendur mæta sem hér segir:

• Kl. 8:20 - 10:30, nemendur í 1. og 2. bekk
• Kl. 9:00 - 11:00, nemendur í 3. og 4. bekk
• Kl. 9:50 - 11:50, nemendur í 5., 6. og 7. bekk

• Kl. 9:15 - 11:15, nemendur í 8., 9. og 10. bekk
• Gæsla verður fyrir þá nemendur í 3. og 4. bekk sem þurfa frá kl. 8:20 - 9:00.
• Umsjónarkennarar munu fylgja þeim nemendum sem skráðir eru í Holtasel þangað að litlu jólum loknum.
• Athugið að það er ekki hádegismatur þennan dag og mikilvægt að nemendur sem fara í Holtasel komi með hádegisnesti. Það verður síðan síðdegishressing.

Nemendur í yngstu deild taka þátt í „Öðruvísi jóladagatali“ sem er á vegum SOS barnaþorpa. Þetta er sjöunda árið í röð sem við tökum þátt í verkefninu. Í fyrra söfnuðust 100 þúsund krónur sem fóru í að styrkja nýtt fjölskyldueflingarverkefni SOS barnaþorpana í Malaví og í ár verður áfram safnað í fjölskylduverkefnið. Tilgangurinn með fjölskyldueflingunni er að hjálpa sárafátækum barnafjölskyldum að standa á eigin fötum.

Jóladagatalið gengur út á það að á hverjum degi sjá nemendur myndbönd frá ólíkum löndum í heiminum.

Hverj­um degi fylgja um­ræðupunkt­ar til að nem­end­ur geti rætt sam­an um efni dags­ins og einnig verð­ur hægt að vinna ýmis verk­efni í tengsl­um við hvern dag.

Lilja Kolbrún og Jón Gísli nemendur í Hvaleyrarskóla hlutu viðurkenningu í textasamkeppninni Fernuflug sem Mjólkursamsalan stendur fyrir. Valdir voru 48 framúrskarandi textar úr þeim 1200 sem bárust í keppnina. Í upphafi árs 2026 munu þessir textar prýða mjólkurfernur MS. Til hamingju, Lilja og Jón Gísli!

Um keppnina má lesa á heimasíðu MS

Við í Hvaleyrarskóla fengum yndislega heimsókn frá leikskólunum í hverfinu – Vesturkoti, Álfasteini og Smáralundi. Börnin komu á jólasamveru yngstu deildar og fylltu skólann gleði og hátíðlegri stemningu þar sem allir sungu saman jólalög undir stjórn Guðrúnar Árnýjar tónmenntakennara. Allir nutu þess að vera saman í desemberljósunum og það var sérstaklega gaman að sjá hvað börnin voru spennt og áhugasöm og tóku vel undir í jólalögunum. Við þökkum þeim kærlega fyrir komuna og hlökkum til að taka á móti þeim aftur síðar.

• Kennsla hefst mánudaginn 5. janúar
  

• Lesferill – allir nemendur prófaðir í 1. – 10. bekk
  

• Orðarún – nemendur í 3. – 8. bekk prófaðir

• Logos skimun, jan – feb. nemendur í 3. bekk

• Valgreinar vorannar hefjast 12. janúar
  

• Námsviðtöl miðvikudaginn 4. febrúar

Eins og undanfarin ár er mikið skáklíf í Hvaleyrarskóla. Skák er í stundatöflu hjá nemendum í 3. - 6. bekk. Við höfum verið með skákmót á öllum stigum skólans í haust og má sjá nokkrar myndir frá mótunum hér fyrir neðan.

Þriðjudaginn 18. nóvember kom slökkvilið höfuðborgarsvæðisins í heimsókn til okkar í Hvaleyrarskóla. Þetta er árviss heimsókn slökkviliðsins í grunnskóla höfuðborgarsvæðisins í þeirra eldvarnarátaki. Nemendur fengu fræðslu á sal og síðan var haldið út þar sem sjúkrabíll og slökkviliðsbíll voru skoðaðir. Það vildi svo til að þegar út var komið þurfti slökkviliðið að fara í útkall þannig að heimsóknin varð styttri í annan endann. Þannig að það þarf að fylgja með mynd frá síðasta ári.

Við vorum með lestrarsprett í október og tengdum hann við Halloween. Lestrarsprettinum lauk föstudaginn 31. október og klæddu nemendur og kennarar sig upp í tilefni Halloween.

Við þökkum ykkur góðan lestrarsprett og hvetjum ykkur til að halda áfram að lesa með barninu/börnunum ykkar.

Eftir að notkun farsíma var bönnuð í skólum Hafnarfjarðar haustið 2024 komu kennarar með þá hugmynd að vera með opið inn í tvær bekkjarstofur fyrir nemendur í hádegishléum. Í annarri stofunni geta nemendur komið inn og lært, undirbúið sig fyrir næstu tíma eða slakað á. Í hinni stofunni eru spilatímar tvisvar í viku, þá er kennari með 2-4 spil uppi við og nemendur geta komið og spilað við samnemendur. Þessu fyrirkomulagi höfum við haldið áfram í vetur og það mælst vel fyrir.

Sunnudaginn 30. nóvember hélt foreldrafélagið piparkökudag með piparkökumálun á sal skólans. Málunin stóð frá kl. 11:00 til 13:00. Viðburðurinn var fyrir nemendur úr öllum bekkjum skólans og fjölskyldur þeirra. Einnig komu tveir jólasveinar í heimsókn.

Foreldrafélagið bauð upp á piparkökur og glassúr. Einhverjir mættu líka með sitt eigið kökuskraut.

Þá var 10. bekkur með fjáröflun fyrir vorferð. Þau seldu kaffi, kakó, smákökur og vöfflur.

Mjög góð mæting var á þennan viðburð.

Eins og undanfarin ár hefur Foreldrafélag Hvaleyrarskóla ákveðið að styrkja bekkjartengla í 1. - 5. bekk um hámark 10.000 kr. á önn til þess að gera eitthvað skemmtilegt með bekkjunum. Fyrirkomulagið er þannig að kvittanir fyrir útlögðum kostnaði auk samantektar á heildarkostnaði eru sendar á póstfang foreldrafélagsins (foreldrafelag@hvaleyrarskoli.is). Það sem fram þarf að koma er; nafn bekkjar og tilefni (hvað var gert með bekknum) og nafn, kennitala og bankaupplýsingar bekkjartengils. Foreldrafélagið endurgreiðir útlagðan kostnað eftir um viku.

Það er mikilvægt að efla starfið í foreldrafélaginu og í kringum börn okkar.

Opnunartími skrifstofu:

Kl. 7:45 - 15:30 mán-fim

Kl. 7:45 - 14:00 fös

Fréttabréf Hvaleyrarskóla. Sent á foreldra nemenda skólans og skólasamfélagið.

Email: hvaleyrarskoli@hvaleyrarskoli.is
Website: www.hvaleyrarskoli.is
Location: Akurholti 1
Phone: 354 565 0200
Facebook: https://www.facebook.com/hvaleyri/