Á vefsíðu segir:
Markmið Foreldraverðlauna Heimilis og skóla er að vekja athygli á því gróskumikla starfi sem fer fram innan leik-, grunn og framhaldsskóla, og þeim mörgu verkefnum sem stuðla að öflugu og jákvæðu samstarfi heimila, skóla og samfélagsins.
Foreldraverðlaun eru veitt til eins verkefnis/viðfangsefnis. Einnig eru veitt einstaklingsverðlaun. Dugnaðarforkurinn er einstaklingur sem hefur unnið að eflingu samstarfs heimilis og skóla af mikilli alúð og óeigingirni. Ef dómnefnd hefur þótt ástæða til, hafa jafnframt verið veitt sérstök hvatningarverðlaun.
Heimili og skóli – landssamtök foreldra standa fyrir Foreldraverðlaunum en samtökin sjálf, stjórn eða starfsfólk tilnefna ekki verkefni, heldur vinnur dómnefnd úr innsendum tilnefningum. Niðurstöður dómnefndar byggjast á greinargerðum og rökstuðningi þeirra aðila sem tilnefndu.
Tilnefning fer fram á rafrænu eyðublaði á vefsvæði Heimilis og skóla og þar er jafnframt að finna leiðbeiningar um tilnefninguna. Einnig er hægt fá upplýsingar hjá skrifstofu samtakanna í síma 516-0100.
Vakin er athygli á að verðlaun eru aðeins veitt til verkefnis/viðfangsefnis sem tilnefnt hefur verið með formlegum hætti á rafrænu eyðublaði á vefsvæði landssamtakanna.
