Síðastliðinn mánuð hefur ýmislegt verið gert í Verkmenntaskóla Austurlands. Stórir viðburðir hafa verið haldnir, nýtt nemendaráð hefur tekið við, umhverfismál hafa verið í brennidepli og undirbúningur er hafinn fyrir Gettu-betur. Meira um það hér fyrir neðan.

Tæknidagur fjölskyldunnar var haldinn í sjöunda sinn laugardaginn 5. október síðastliðinn. Mikill mannfjöldi sótti daginn heim eins og undanfarin ár. Er viðburðurinn einn sá fjölsóttasti á Austurlandi og hefur skapað sér sterkan sess í austfirsku samfélagi. Líkt og undanfarin ár var dagskráin gríðarlega fjölbreytt og ungir og aldnir fundu allir eitthvað við hæfi.

Lesa má um daginn hér fyrir neðan og sjá dagskrá hans.

Á haustdögum var efnt til kosninga í nemendaráð. Einn hópur bauð sig fram í nemendaráð og var því sjálfkjörinn. Í stjórn nemendafélagsins skólaárið 2019-2020 sitja María Bóel formaður, Birna Marín varaformaður, Steinunn Dagmar gjaldkeri og Ýr ritari. Meðstjórnendur eru Aníta Rakel, Eva Björg, Eyrún Arna og Særún Birta. Frekari upplýsingar um nemendafélagið og skipan í önnur ráð og nefndir má finna hér.

Stjórnin er strax farin að láta til sín taka og í þessum töluðu orðum er verið að taka nemendafélagsherbergið allt í gegn. Búið er að rífa niður vegg og málningarvinna að hefjast. Félagið er að panta nemendafélagspeysur og haldið var myndarlegt kaffihús á Tæknideginum. Fjöldi mála er á stefnuskrá stjórnarinnar og það verður gaman að fylgjast með þeim að störfum.

Austfirsku ólympíuleikarnir voru nýlega endurvaktir. Um er að ræða samstarfsverkefni við FAS og ME. Að þessu sinni var dagurinn haldinn hér í Neskaupstað og var keppt í fjölda greina.

Afar ánægjulegt var að sjá daginn endurvakinn og verður gaman að sjá hann skjóta sterkum rótum í félagslífi skólans á næstu árum.

Hvaða skóli bar sigur úr býtum? Smelltu á fréttina hér fyrir neðan.

Undirbúningur er hafinn fyrir Gettu-betur, spurningakeppni framhaldsskólanna. Þann 11. september var haldin opin æfing sem var vel sótt og viku síðar var haldið úrtökupróf þar sem keppt var að því að komast í æfingahópinn.

Frekari fréttir af Gettu-betur undirbúningi má lesa hér fyrir neðan.

Umhverfismál eru mjög áberandi innan skólans enda skartar hann Grænfána. Innan skólans er virk umhverfisnefnd þar sem sitja fulltrúar starfsfólks og nemenda og skipulögð eru ýmis verkefni sem snúa að umhverfismálum.

Í september fengu nemendur fræðslu frá samtökunum Ungir umhverfissinnar. Þar var fjallað um hvað við getum gert til þess að sporna við loftslagsbreytingu og hvernig við getum haft áhrif á nærsamfélag okkar og umhverfismál sem snerta okkur beint. Hægt er að kynna sér samtökin hér.

Nefndin vakti einnig athygli á plastlausum september og á degi íslenskrar náttúru var sett um fataskiptislá í skólanum. Hún vakti mikla athygli og skrifað var um hana í Austurfrétt. Fréttina má sjá hérna fyrir neðan.

Nú fer að styttast í næsta hluta verkefnisins Will to MotivatE(U). Nemendurnir Steinunn Dagmar og Atli Fannar halda til Poggibonsi á Ítalíu með starfsmönnunum Birgi og Salóme þann 20. október. Þar verður unnið í anda jafningjafræðslu og er dagskráin þéttskipuð vikuna þar á eftir. Síðan verður haldið heim þann 26.

Í desember verður síðan næsti verkefnishlutinn og þá verður haldið til Ungverjalands þar sem nemendur kynnast því að læra í gegnum leik. Umsóknarfrestur er enn fyrir Ungverjalandsferðina sem mun standa frá 9.-13. desember.

Hér fyrir neðan má sjá frekari upplýsingar um erlent samstarf innan skólans.

Þá er komið að næsta lið í tæknihorninu. Það er hið veflæga forrit Padlet. Padlet er rafræn tafla þar sem allir geta lagt sitt af mörkum og skrifað á töfluna úr ipad, síma eða tölvu. Meðal þess sem hægt er að skrifa texta, teikna myndir, setja inn myndir og myndbönd.

Við hvetjum þig til að prófa Padlet með því að smella hér.

Vetrarfrí 21.-22. október.