Nóvember er genginn í garð og alltaf nóg að gerast í Engidalsskóla. Hrekkjavakan var hrikaleg og hrollvekjandi. Lið úr Engidalsskóla tók þátt í handboltamóti sem einkenndist af sigrum og sterkum liðsanda. Vinavikan var sérlega vinalega og fyrsta snjónum var vel fagnað. Við höfum minnkað umfjöllun um einstaka viðburði í þessum mánaðarlegu fréttabréfum en gerum þeim betur skil á facebook og Instagram og hvetjum ykkur til að fylgja okkur þar. Þá læðist ein og ein frétt inn á heimasíðuna en það er þá það sama og er á facebook og Instagram. Skólastjórnendur hafa það að markmiði að senda ykkur sem fæsta pósta og ef við þurfum að koma skilaboðum til ykkar látum við umsjónarkennara setja það í föstudagspóstana. Þannig teljum við okkur vera að minnka áreitið á foreldra eins og við getum. Það er því þeim mun mikilvægara að lesa föstudagspóstana frá umsjónakennurum. Þessir póstar eru mjög fræðandi og skemmtilegir og gefur foreldrum tækifæri á að átta sig á því hvað barnið þeirra er að læra og spyrja það út úr og fylgjast þannig betur með náminu. Umræða um heimanám skýtur reglulega upp kollinum og er umfjöllun um það sérstaklega hér neðar í fréttabréfinu.
Við vorum afskaplega ánægð með mætinguna á líðanfundina í október og þann samtakamátt sem við upplifðum í þessu flotta foreldrasamfélagi sem er hér í norðurbænum. Gerðir voru farsældarsáttmálar í öllum árgöngum sem er frábært. Það er trú okkar að sameinuð getum við gert mjög góða hluti fyrir börnin ,,okkar" allra. Nýjustu niðurstöður skólapúlsins segja okkur líka að við erum á réttri leið því þær eru mjög góðar. Nánari umfjöllun um niðurstöðurnar eru hér fyrir neðan. Fyrir þá sem ekki þekkja til Skólapúlsins þá er hann það tæki sem Hafnarfjörður nýtir hvað mest til ytra mats skólanna sinna. Skólapúlsinn sendir bæði nemendum, foreldrum (á tveggja ára fresti) og starfsmönnum kannanir, misjafntt er hvort það er árlega eða annað hvert ár. Á hverju ári (meira að segja tvisvar á ári) eru nemendur í 6.-10. bekk látnir svara spurningum um líðan í skóla, áhuga á náminu, samskipti við aðra nemendur og kennara og ýmislegt fleira.
Strax eftir vetrarfrí byrjuðum við að bjóða aftur upp á hafragraut og er hann í boði alla daga frá kl. 8:00-8:15. Það voru margir sem söknuðu grautsins og voru mjög ánægðir þegar hann var aftur í boði.
Vinavikan gekk mjög vel og í lok hennar fengu allir starfsmenn og nemendur vinaband sem á að minna þá á mikilvægi vináttunnar og þá ábyrgð og virðingu sem við berum gagnvart náunganum. Vináttu þarf að rækta og hugsa um líkt og allt sem er verðmætt. Við vitum að við erum eina manneskjan sem við getum stjórnað og verðum að ákveða hvernig við viljum koma fram við vini og samferðafólk og hvernig við viljum láta muna eftir okkur sem vini og/eða samferðamanni.
Þessi vika er styttri nemendavika en oft áður. það er foreldrasamráð 13. nóvember og þá mæta nemendur með foreldrum/forsjáraðilum til samtals við umsjónarkennara. Margir árgangar ætla að prófa nemendastýrð samtöl og verður spennandi að sjá hvernig það gengur. Við höfum haft það fyrir reglu að setja alla óskilamuni upp í andyri skólans á foreldrasamráðsdögum og biðjum við ykkur um að líta þar við og taka það sem tilheyrir ykkar barni. Fyrir okkur er þetta stór þáttur í umhverfismálum þar sem skólinn er Grænfánaskóli og mikilvægt að allar flíkur finni sinn eiganda. Við gerum okkar besta til að koma öllu því sem er merkt á rétta eigendur og því mikilvægt að merkja fatnað vel. Þann 14. nóvember er svo starfsdagur og eiga nemendur frí þann dag.
Dagur mannréttinda barna er 20. nóvember og þann dag ætlum við að halda lýðræðisþing með nemendum á miðstigi.
Engidalsskóli er heilsueflandi grunnskóli, við leggjum mikla áherslu á hollt nesti, aukna hreyfingu og líðan nemenda. Við ræðum líka um svefn og mikilvægi hans. Á vefsvæði Embætti Landlæknis, sem hýsir verkefnið Heilsueflandi grunnskóli og Heilsuveru er að finna allskyns ráðleggingar og látum við þær fljóta hér með.
Við vekjum líka athygli foreldra/forsjáraðila á glærum, sem fengnar eru frá Heimili og skóla, um miðlanotkun og er að finna hér neðar í fréttabréfinu. Þær eru bæði fróðlegar og geta verið leiðbeinandi, hvetjum ykkur til að skoða þær.
Á líðanfundunum núna í október var örlítið komið inn á stoðþjónustu skóla og hvað væri undir henni. Á heimasíðu skólans undir Nám og kennsla, stuðningur er að finna mikið af upplýsingum, s.s. hver sér námsráðgjafi, tengiliður farsældar, deildarstjóri stoðþjónustu og fleira. Þar er líka farið yfir hlutverk hvers og eins. Eins og staðan er núna er ekki starfandi skólahjúkrunarfræðingur við skólann, en okkur hefur verið tjáð að öllum skoðunum og bólusetningum verði sinnt.
Lítilsháttar breyting hefur verið gerð á skóladagatali Engidalsskóla og snýr hún að skólaslitunum sem verða síðdegis sama dag og íþróttadagurinn, eins og síðasta vor. Uppfært skóladagatal er að finna á heimasíðunni.
Með bestu kveðju,
Skólastjórnendur Engidalsskóla.
