Kæru foreldrar/forsjáraðilar.
Skólaárið fer vel af stað og er veðrið örugglega að hjálpa okkur eitthvað. Það er mikil gleði og gaman í allri útiveru. Það virðist líka vera góð stemming í skólanum með að leggja áherslu á lestur og læsi og gaman að ganga um skólann snemma á morgnanna og sjá alla á kafi í lestri.
Í umræðunni síðustu misseri um skólamál hefur innra mat grunnskóla borið oft á góma og vil ég upplýsa um að í Engidalsskóla erum við stolt að þeirri vinnu sem unnin er þar. Innra mat skólans fer fram með ýmsu móti og höldum við utan um það með forritinu Bravolesson. Kennarar ígrunda í litlum hópum eigin kennslu, námskrána, vinnulag stjórnenda og fleira. Stjórnendur sitja kennslustundir hjá kennurum og skoða ákveðna þætti í kennslunni, allt eftir ákveðinni forskrift, og gefa svo endurgjöf. Þá eru litlir rýnihópar, kannanir og starfsmannasamtöl. Ytra matið fer í gegnum þriðja aðila, Skólapúlsinn, MMS (Lesferill), Rannskóknir og greiningu og íslenskar æskulýðsrannsóknir. Í framhaldi af þessu er svo gerð umbótaáætlun sem birtist í starfsáætlun skólans en ný áætlun mun birtast innan tíðar á heimasíðu skólans.
Þegar kemur að upplýsingagjöf frá skólanum þá förum við ýmsar leiðir svo við náum til sem flestra. Á heimasíðu skólans er að finna alls kyns gagnlegar upplýsingar um skólastarfið og hvet ég ykkur til að skoða hana vel.Við sendum fréttabréf, eins og þetta, mánaðarlega þar sem fram koma ýmsar leiðbeiningar og upplýsingar um það sem er á döfinni eða hefur á daga okkar drifið. Umsjónarkennarar senda vikupóst og á síðasta ári byrjuðum við með Facebook og Instagram síðu þar sem birtar eru myndir frá skólastarfinu í rauntíma og myndir af verkum nemenda, ég vona að þið fylgið okkur á þessum miðlum.
Það er mikill kostur að það er töluverður stöðuleiki starfsmanna hjá okkur. Ekki er neinn nýr kennari hjá okkur í vetur. Við fengum nýjan skrifstofustjóra Ingu Rakel Einasrsdóttur og nokkra nýja starfsmenn í frístund. Gabriella Ósk Egilsdóttir var ráðinn aðstoðar deildarstjóri, Birta Lind Hallgrímsdóttir (sem líka er í stuðningi á skólatíma), Eyvör Pálsdóttir, Heiða Karen Fylkisdóttir og í dag byrjaði Auður Eygló Andrésdóttir. Við erum meðvituð um að það eru tækifæri til bætinga í frístundastarfinu og höfum við sett kraft í það. Við vorum með námskeið fyrir alla starfsmenn í vor um starf frístundaheimila og svo aftur í ágúst þá með áherslu á útinám og útileiki. Við erum líka að taka í gagnið gæðakerfi fyrir frístundaheimilið og ætlum okkur að meta starfið þar á svipaðan hátt og við gerum við kennsluna í skólanum. Við munum örugglega senda út einhverjar kannanir og fá ykkar viðhorf og vonum að þið takið því vel.
Síðustu ár höfum við lagt mikla áherslu á lestur og læsi og erum að byrja lesturinn af krafti. Við erum búin að skrá skólann í lestrakeppni (sjá nánar hér fyrir neðan) og erum líka að skoða heimalesturinn með nemendum en við eigum auðvelt með að taka út úr Læsi alskyns tölfræðigögn. Í vetur munum við líka auka áherslu á stærðfræði. Stefnt er á aukna hlutbindingu og fleiri verkefni út fyrir bókina. Markmiðið er að enn fleiri hafi gaman af stærðfærðinni og við vonum að við hjálpumst öll að við að gera þetta skemmtilegt.
Í Engidalsskóla eru eina heimanámið lestur og orðaskrift í yngri bekkjum. Alltaf eru einhverjir sem vilja meira heimanám en lestur en samkvæmt þeim könnunum sem við höfum gert er það mikill minnihluti foreldra. Við bendum reglulega á efni til að auka lestrafærni, sjá fréttabréfin okkar, auk þess höfum við bent foreldrum á ýmsar síður á netinu þar sem bæði er hægt að prenta allskyns dót út eða vinna í tölvu eða spjaldtölvu. Þá er mikill lærdómur falinn í að spila með börnunum allskyns skemmtileg spil sem þjálfa lestur, stærðfræði og félagsfærni og út úr því fæst líka góð samvera. Göngutúrar úti í náttúrunni og hafa með bækur um plöntur og jurtir, fugla og steina. Lesa á skilti, skoða form í umhverfinu, telja bíla, leysa þrautir og svo framvegis. Ég vona að þessi upptalning gefi hugmyndir, sem þið vissu auðvitað af, en maður á það til að gleyma góðum hugmyndum í erli dagsins.
Aðalfundur foreldrafélagsins verður haldinn mánudaginn 15. september kl. 17:30. Við hvetjum ykkur til að mæta og taka virkan þátt í þessu þarfa starfi. Þetta er mjög gott tækifæri til að kynnast öðrum foreldrum, stækka tengslanetið og hafa áhrif til góðs á það samfélag sem börnin ykkar eru að alast upp í. Það verður seint of sagt að allar rannsóknir sína mikilvægi þess í allri forvarnarvinnu að foreldrar barna þekkist, tali sama og að foreldrar sýni því umhverfi sem barnið er í áhuga.
Með bestu kveðju,
Skólastjórnendur Engidalsskóla.
