Mars hefur heldur betur verið tíðindamikill. Fyrri hluta mánaðar var skólastarfið með hefðbundnum hætti og voru afar vel heppnaðir Kærleiksdagar sem enduðu með árshátíð NIVA. Einnig var miðannarmat birt og nemendur lýstu skoðunum sínum á skólastarfinu í gegnum áfangamat. Skólinn varð einnig fimmti framhaldsskóli landsins til að hjóta jafnlaunavottun.

Eins og flestir ættu að vita varð síðan alger umpólun um miðjan mánuðinn þegar samkomubann var sett á. Það þýddi að framhaldsskólar á landinu skelltu í lás og kennslan færðist alfarið í netheima. Starfsfólk og nemendur höfðu sinnt undirbúningi í vikunni á undan og þegar samkomubannið skall á voru allir tilbúnir í breytinguna sem hefur gengið frábærlega og eiga allir mikið hrós skilið. Þetta hefur einnig vakið mikla og verðskuldaða athygli á okkar frábæra skólastarfi. Meira um það hér fyrir neðan.

Vegna samkomubannsins hefur þurft að færa ýmislegt til hliðar eða í annað form. Forvarnarmálþingi var frestað til haustsins og leikstarfi Djúpsins og erlendu samstarfi sömuleiðis. Skólakynning fyrir foreldra var haldin í gegnum fjarfundarbúnað og heppnaðist vel.

Nú er komið páskafrí og því tilvalinn tími til að hlaða batteríin, ferðast innandyra og njóta samvista við fjölskylduna!

Kærleiksdagar VA voru haldnir í annað sinn í byrjun mars og var undirliggandi markmið að safna fé til kærleiksríks málefnis. Nemendur völdu málefnið og kusu að styðja við mikilvægt starf Pieta samtakanna. Í lok daganna höfðu safnast 170.000 krónur sem voru afhentar samtökunum.

Hér fyrir neðan má sjá ýmislegt frá kærleiksdögum.

Árshátíð VA, Stjörnubjört nótt, var haldin í Egilsbúð í lok kærleiksdaga. Mikið var um dýrðir, salurinn eins og stjörnuhiminn og er óhætt að segja að nemendaráðið hafi unnið frábært starf við undirbúning árshátíðarinnar.

Karen aðstoðarskólameistari og Petra Lind sálfræðikennari fóru á kostum sem veislustjórar og tónlistarmennirnir Auður og Bríet og héldu uppi fjörinu ásamt DJ Snorra Ástráðs.

Yfir borðhaldinu var söngkeppni VA haldin. Söngatriðin voru af ýmsum toga; Ísabella Danía flutti lagið Talking to the Moon eftir Bruno Mars, Snædís Erla og Maddý Ósk fluttu lag Haley Reinhart, Can´t Help Falling in Love, Aron Víðir og Sigurjón fluttu Valla Reynis og Birna Marín flutti lagið Still Loving You úr smiðju Scorpions. Bar Ísabella Danía sigur úr býtum.

Verkmenntaskóli Austurlands hefur hlotið jafnlaunavottun og er þar með fimmti framhaldsskólinn á landinu að hljóta vottunina.

Undirbúningur og innleiðing á jafnlaunastaðlinum hefur staðið yfir síðan í haust. Vinnan við undirbúning og innleiðingu, sem og vottunarferlið, var leitt af Birgi Jónssyni, gæðastjóra skólans. Faggilti vottunaraðilinn iCert var ráðinn til að meta hvort skilyrði staðalsins væru uppfyllt og voru úttektir gerðar í desember 2019 og febrúar s.l. með þeim ánægjulega árangri að vottun var veitt um miðjan mánuð.

Fyrr í vetur stóðu fjórtán iðn- og starfsnámsskólar á Íslandi sameiginlega að útgáfu blaðsins 2020, þar sem gerð er grein fyrir starfsnámi frá ýmsum hliðum en í þessum fjórtán skólum eru hátt í sextíu námsbrautir. Í haus blaðsins segir eftirfarandi: Nafn blaðsins vísar í sameiginlegt markmið skólanna, skýrt og mælanlegt markmið, að 20% grunnskólanemenda skrái sig í iðn- og verknám frá og með árinu 2020.

2020 var dreift til foreldra og forráðamanna allra nemenda í 8., 9. og 10. bekk á landinu, í samtals um 12.000 eintökum.

Í blaðinu var m.a. viðtal við þá Adam, Fannar, Guðjón, Stein og Þór sem eru nemar í vélstjórn og Hlyn sem hefur fléttað á skemmtilegan hátt saman nám í rafvirkjun og nám til stúdentsprófs.

Blaðið má nálgast hér fyrir neðan.

Þegar samkomubann var kynnt föstudaginn 13. mars og jafnframt tilkynnt að framhaldsskólum yrði lokað hafði undirbúningur staðið yfir í VA vikuna á undan. Þá hafði verið ákveðið að kennt yrði eftir stundaskrá, kerfið til að gera það var valið, kennarar þjálfaðir og þeir þjálfuðu síðan nemendur.

Kerfið sem varð fyrir valinu heitir Big Blue Button eða Blái hnötturinn. Nemendur skrá sig inn í kerfið úr tölvunni heima hjá sér og þá opnast fyrir þeim kennslustofan. Þar eru allir í mynd, einnig kennarinn, sem getur sýnt glærur og dæmi á snertiskjá. Nemendur geta síðan haft samskipti sín á milli og kennarinn talað við einstaka nemendur ef þarf, eða skipt þeim upp í hópa.

Markmiðið með þessu var að halda nemendum í takti, virkni og félagslegum samskiptum.

Síðan hafa liðið þrjár vikur og óhætt er að segja að nemendur og kennarar hafi farið á kostum á Bláa hnettinum. Hér fyrir neðan má sjá dæmi um útfærslur sem gripið hefur verið til:

Eitt af verkefnunum í skólalokuninni er að halda uppi andanum meðal starfsfólks. Starfsmannahópurinn er gríðarlega samheldinn og til þess að halda því áfram hefur kaffistofan verið færð í netheima.

Starfsfólk hittist í kaffi tvisvar á dag, á morgnana og eftir hádegismat. Þar er allt milli himins og jarðar rætt og alltaf mikil og góð stemning.

Meðal þess sem hefur verið gert var að hafa sparifatadag eins og sjá má á myndinni hér fyrir neðan.

Markmiðið síðan skólinn lokaði hefur alltaf verið að halda nemendum í virkni, takti og félagslegum samskiptum. Til þess að styðja við það hefur Nemendaþjónusta VA verið afar virk. Farið er yfir mætingu nemenda í lok hvers dags og gripið er inn í um leið ef stefnir í óefni.

Nemendur hafa einnig getað sótt viðtöl hjá náms- og starfsráðgjafa og haft samband eftir þeim leiðum sem þeim þykir hentugastar.

Frá skólalokun hefur skólinn vakið mikla athygli út um allt land. Salóme kennari var í viðtali á N4 um þær aðferðir sem hún hefur verið að nýta m.a. í heimilisfræði og íþróttum og Lilja skólameistari var tekin tali í morgunþættinum á Rás 1 og Rás 2 um skólastarfið.

Viðtölin má nálgast í hlekkjunum hérna fyrir neðan:

Eitt af því sem hefur verið gert til að halda utan um nemendur er að bjóða upp á svokallað VA-spjall. Þá hitta Lilja og Birgir nemendur í gegnum fjarfundabúnað og ræða allt milli himins og jarðar. Hefur þetta verið haldið í tvígang og töluverður fjöldi nemenda hefur tekið þátt.

Vel heppnuð kynning fyrir forsjáraðila var haldin í gegnum fjarfundabúnað á dögunum. Þar var skólastarfið kynnt og vettvangur fyrir forsjáraðila til að spyrja spurninga.

Fyrir þá sem komust ekki á kynninguna má finna kynningu á skólanum í hlekk hér fyrir neðan. Ef það eru einhverjar frekari spurningar þá er hægt að skoða allt sem skólanum tengist á heimasíðunni, va.is. Þar eru einnig netföng starfsfólk og þá hægt að hafa samband í gegnum þau.

Stefnt var að sýningum á Adamsfjölskyldunni í marsmánuði. Vegna samkomubanns hefur það verið sett á ís og stefnt er að því að halda leiklistarstarfinu áfram í haust.

Stefnt var að því að taka á móti 20 kennurum frá samstarfslöndum okkar 20.-24. apríl en því hefur nú verið frestað til haustsins.

Sama gildir um skiptinám nemenda sem hefur einnig verið frestað til haustsins.

Umsóknir um fleiri Erasmus verkefni hafa verið sendar inn auk þess að umsókn um áframhaldandi samstarfsverkefni er í burðarliðnum.

Hér fyrir neðan má sjá frekari upplýsingar um erlent samstarf innan skólans.

Í tæknihorninu að þessu sinni ætlum við að kynna fyrir ykkur forrit sem heitir ExplainEverything en það er einmitt gjaldfrjáls aðgangur að því núna. Smáforritið hentar einkar vel til þess að útskýra allt milli himins og jarðar. Það býður upp á einfalt og gott viðmót til þess að taka upp af þeim skjá sem þið vinnið með ásamt því að vera með tússtöflu þar sem hægt er að útskýra í máli og myndum. Það er einnig hægt að hlaða niður myndum og skjölum til að nýta inn í forritið. Við hvetjum ykkur til að prófa.

Hægt er að nálgast það í vefútgáfu og sem smáforrit.

Smellið hér til að nálgast vefútgáfuna.

Páskafrí: 4.-14. apríl