Kæru foreldrar/forsjáraðilar.
Nú styttist í skólabyrjun 2025. Við hefjum skólastarfið á samráðsfundum foreldra, nemenda og kennara þar sem farið er yfir væntingar til skólaársins og nemendur setja sér markmið í takt við aldur og þroska hvers og eins. Ekki er eiginleg skólasetning á sal en hefð hefur skapast fyrir því að skólastjóri sendir stutta kveðju í formi myndbands til foreldra/forsjáraðila á skólasetningardegi.
Fyrir nýja foreldra þá er vert að nefna að stjórnendur nýta þennan vettvang, fréttabréfin, til þess að segja frá skólastarfinu, viðburðum, koma upplýsingum á framfæri til foreldra/forsjáraðila ásamt því að lauma að ykkur hagnýtum ráðum, leiðbeiningum og fróðleik. Á síðasta skólaári byrjuðum við líka að nýta okkur Facebook og Instagram til að koma skilaboðum áfram og birta myndir úr skólastarfinu. Mjög skýrar reglur eru um notkun þessara miðla þegar kemur að myndefni þar sem nemendur sjást. Í fyrra fékk skólinn nýja heimasíðu engidalsskoli.is og er þar að finna töluvert af hagnýtum upplýsingum.
Síðustu ár höfum við kennt yngstu nemendunum sund í sundlauginni á Hrafnistu. Þegar við fórum í sumarfrí var það enn áætlunin en svo varð breyting í sumar þannig að ekki verður hægt að nýta laugina á Hrafnistu. Það er löngu búið að úthluta öllum tímum í sundlaugum sveitarfélagsins þannig að við verðum að þrengja að sundkennslunni í Sundhöllinni. Lendingin er að 1.-2. bekkur byrjar á að fara í sund tvisvar í viku í skólabyrjun og út september og svo aftur frá miðjum apríl og fram að skólalokum. 3.-7. bekkur verður svo í sundi frá lok september fram í miðjan apríl en á frí frá sundi þegar 1. og 2. bekkur eru í sundi. Með þessu móti fá allir lágmarksfjölda sundtíma sem eru 20 tímar á ári. Við munum svo reyna að bæta einhverjum hreyfitímum við á móti þessari skerðingu.
Síðustu haust höfum við haldið svokallaða líðanfundi með foreldrum, umsjónarkennurum og stjórnendum. Ánægja hefur verið með þessa fundi en í fyrra kom ósk um að seinka þeim aðeins og eru þeir á áætlun í lok september, hver og einn árgangur fær nánari upplýsingar um að síðar.
Við viljum nota þennan vettvang til að minna á reglur um notkun hjóla á skólatíma en þær er að finna á heimasíðu skólans.
Hagnýtar upplýsingar til foreldra:
Mikilvægt er að upplýsa skólann um forföll nemenda en hægt er að skrá veikindi beint inn á mentor.is auk þess sem hægt er að hringja í skólann í síma 5554433. Foreldrar geta ekki gefið leyfi í einstaka tímum og því þarf alltaf að hringja á skrifstofu skólans til þess að tilkynna leyfi.
Gæsla er í skólanum frá kl. 8:00 og kennsla hefst 8:20. Nemendur geta mætt 7:45 og fengið hafragraut að kostnaðarlausu. Grauturinn er í boði frá kl. 8:00 til kl. 8:15 og hefst afgreiðsla á honum 1. september.
Nýtt fyrirtæki tók við afgreiðslu á hádegismat fyrir nemendur í sumar. Fyrirtækið heitir Í Mat og er markmið þeirra að bjóða upp á fjölbreyttar og næringaríkar máltíðir fyir nemendur og starfsfólk grunnskólanna í Hafnarfirði. Verið er að leggja síðustu hönd á skráningarkerfið þeirra Matarstund en fyrstu dagana verður sendur matur fyrir alla nemendur en svo einungis fyrir þá sem skráðir eru í mat. Þið fáið nánari upplýsingar um það síðar.
Við leggjum sérstaka áherslu á að þau börn sem ekki verða í mataráskrift komi með hollt og næringarríkt nesti sem laust er við hnetur (sjá leiðbeiningar um nesti hér neðar í fréttabréfinu).
Engidalsskóli er heilsueflandi skóli og það birtist meðal annars í meiri hreyfingu, lengri útivist, aukinni geðrækt og áherslum á hollt og gott nesti. Við hvetjum foreldra til að passa upp á að nemendur fái nægan svefn og hvetjum starfsfólk, nemendur og foreldra til þess að ganga eða hjóla í skólann ef kostur er.
Við hlökkum til þess að sjá skólagangana fyllast af lífi og vonumst til ánægjulegs og farsæls samstarfs við ykkur foreldra/forsjáraðila.
Með bestu kveðju,
Skólastjórnendur Engidalsskóla.
